อาคนฺตุเกน อุปฆาเตน สสฺสํ วินสฺสติ นิรูปฆาตํ สสฺสํ สสฺสุทฺธรณสมยํ ปาปุณาตีติ ฯ
อาม ภนฺเตติ ฯ เอวเมว โข มหาราช โย โกจิ อกาเล มรติ โส อาคนฺตุเกน โรเคน
ปฏิปีฬิโต วาตสมุฏฺฐาเนน วา ฯ เป ฯ สตฺติเวคปฏิปีฬิโต วา มรติ ฯ อิทเมตฺถ
มหาราช การณํ เยน การเณน อกาลมรณํ อตฺถิ ฯ
สุตปุพฺพํ ปน ตยา มหาราช สมฺปนฺเน สสฺเส ผลธเร มญฺชริกํ ปตฺเต กรกวสฺสํ
นาม วสฺสชาตํ นิปติตฺวา ลิกฺขติ วินาเสติ อผลํ กโรตีติ ฯ สุตปุพฺพํ ภนฺเต อมฺเหหิ
เอตํ ทิฏฺฐปุพฺพญฺจาติ ฯ อปิ นุ โข ตํ มหาราช สสฺสํ กาเล นฏฺฐํ อุทาหุ อกาเล
นฏฺฐนฺติ ฯ อกาเล ภนฺเต ยทิ ตํ ภนฺเต สสฺสํ กรกวสฺสํ น ปวสฺเสยฺย ตโต ตํ
สสฺสํ สสฺสุฏฺฐานสมยํ ปาปุเณยฺยาติ ฯ กึ ปน มหาราช อาคนฺตุเกน อุปฆาเตน สสฺสํ
วินสฺสติ นิรูปฆาตํ สสฺสํ สสฺสุทฺธรณสมยํ ปาปุณาตีติ ฯ อาม ภนฺเตติ ฯ เอวเมว
โข มหาราช โย โกจิ อกาเล มรติ โส อาคนฺตุเกน โรเคน ปริปีฬิโต วาตสมุฏฺฐาเนน
วา ปิตฺตสมุฏฺฐาเนน เสมฺหสมุฏฺฐาเนน วา สนฺนิปาติเกน วา อุตุปริณามเชน วา
วิสมปริหารเชน วา โอปกฺกมิเกน วา ชิฆจฺฉาย วา ปิปาสาย วา สปฺปทฏฺเฐน วา
วิสมาสิเตน วา อคฺคินา วา อุทเกน วา สตฺติเวคปฏิปีฬิโต วา อกาเล มรติ ฯ
ยทิ ปน อาคนฺตุเกน โรเคน ปฏิปีฬิโต น ภเวยฺย สามเยน มรณํ ปาปุเณยฺย ฯ
อิทเมตฺถ มหาราช การณํ เยน การเณน อกาเล มรณํ อตฺถีติ
อจฺฉริยํ ภนฺเต นาคเสน อพฺภูตํ ภนฺเต นาคเสน สุทสฺสิตํ การณํ
สุทสฺสิตํ โอปมฺมํ อกาเล มรณสฺส ปริทีปนาย อตฺถิ อกาเล มรณนฺติ อุตฺตานีกตํ ปากฏํ
กตํ วิภูตกตํ ฯ อจิตฺตวิกฺขิตฺตโกปิ ภนฺเต นาคเสน มนุโข เอกเมเกน ว โอปมฺเมน
นิฏฺฐํ คจฺเฉยฺย อตฺถิ อกาเล มรณนฺติ กิมฺปน มนุโช สเจตโน ฯ ปฐมอุปเมนวาหํ
ภนฺเต สญฺญตฺโต อตฺถิ อกาเล มรณนฺติ อปิ จาหํ ภนฺเต อปราปรํ นิพฺพาหนํ โสตุกาโม
น สมฺปฏิจฺฉินฺติ ฯ

กาลากาลมรณปญฺโห ปฐโม ฯ

ภนฺเต นาคเสน สพฺเพสํ อรหนฺตานํ ปรินิพฺพุตานํ เจติเย จ จิตฺตกายํ ปาฏิเหรํ
โหติ อุทาหุ เอกจฺจานํ โหติ เอกจฺจานํ น โหตีติ ฯ เอกจฺจานํ มหาราช โหติ เอกจฺจานํ
น โหตีติ ฯ กตเมสํ ภนฺเต โหติ กตเมสํ น โหตีติ ฯ ติณฺณํ ปุคฺคลานํ มหาราช